Минский городской исполнительный комитет
Першамайскі раён – светлай мары крыніца
Версия для слабовидящих"Мы любім Мінск" – пад такой назвай 12 верасня ў публічнай бібліятэцы №15 імя Цёткі адбылася прэзентацыя фотапаэтычнага праекта Міколы Лінніка.
З прывітальным словам выступіла загадчык бібліятэкі Рэгіна Багамолава, якая прадставіла прысутным Мікалая Міхайлавіча, як таленавітага фотамастака, двойчы дыпламанта літаратурных конкурсаў "Дэбют" Першамайскага раёна г. Мінска, пераможцу фотаконкурсу "Мой Первомайский – 2014", шматразовага дыпламанта рэспубліканскіх фотаконкурсаў "На связи с миром", лаўрэата ХІІ, ХІІІ Мінскіх гарадскіх фестіваляў нацыянальных культур "Яднанне". Мікола Ліннік – сябра Беларускага саюза журналістаў. Фатаграфіяй і журналістыкай займаецца больш пяцідзесяці гадоў, з’яўляецца ўдзельнікам шматлікіх науковых канферэнцый, аўтарам 38 персанальных фотавыстаў.
Выстава "Мы любім Мінск" – фотапаэтычны праект Міколы Лінніка, дзе фатаграфіі спалучаюцца з вершамі васьмі беларускіх паэтаў і прысвечаны нашай цудоўнай сталіцы, яе помнікам і краявідам. "Сугучнасць вобразаў і словаў" - гэта асноўнае, чым кіруецца аўтар выставы. Фотамастак шукаў краявіды, аб’екты, якія б праілюстравалі паэтычныя творы, але некаторыя вершы адмыслова пісаліся пад фотаздымак Міколы Лінніка. У прэзентацыі ўдзельнічалі майстры прыгожага пісьменства: Віктар Шніп, Алена Хахелька, Аксана Спрынчан, Вольга Шпакевіч, Ядвіга Рай. Прывітальныя словы ўдзячнасці аўтару і аповеды кожнага пра свой куточак малой Радзімы перамяжоўваліся з выступленнем барда і кампазітара Валерыя Віткіна. Яго песні пад гітару: аутарская "Мая Беларусь", "Сябрам" на словы Кастуся Цыбульскага, "Ля музея Купалы" на словы Рэгіны Багамолавай, "Не журыся" Фелікса Баторына і іншыя літаральна заваражылі публіку і выклікалі буру апладысментаў.
Мікола Ліннік падзяліўся меркаваннямі, што гэта выстава стане пачаткам новага доўгатэрміновага праекта і прапанаваў прысутным прыняць у ім удзел.
Напрыканцы госці выказалі вялікую ўдзячнасць фотамастаку за ўменне бачыць прыгожае і адлюстроўваць яго ў сваіх працах.
З вялікай цікавасцю чытычы знаёміліся з кніжнай выставай "Мой родны Мінск, цябе люблю я ўсей душой!", падрыхтаванай супрацоўнікамі бібліятэкі.
… Бягуць гады, нібыта хмараў зграя.
Няхай жыве Натхненне, што стварае!
(Таццяна Барысюк)
[widgetkit id=802]