Минский городской исполнительный комитет
Першамайскі раён – светлай мары крыніца
Версия для слабовидящихВыстаўка, прысвечаная Міжнароднаму дню сям’і
15 мая 2018 года ў 16.00 Дзяржаўны літаратурна-мемарыяльны музей Якуба Коласа запрашае на адкрыццё выстаўкі «І злучана быццё і небыццё», прысвечанай Міжнароднаму дню сям’і.
20 верасня 1993 года Генеральная асамблея ААН сваёй рэзалюцыяй вызначыла 15 мая Міжнародным днём сям’і. У календары знамянальных дат гэта асобы дзень, гэта – свята радасці, цеплыні і адчування надзейнасці блізкага чалавека. Менавіта ў сям’і маленькі чалавек упершыню адчувае глыбокую радасць ад сагравальнай бацькоўскай любові, што з’яўляецца залогам яго ўпэўненнага ўступлення ў вялікае складанае жыццё.Тут перадаеца мудрасць ад пакалення да пакалення, якая каранямі сыходзіць у вечнасць.
Якуб Колас нарадзіўся ў вялікай сялянскай сям’і. Бацька – Міхал Казіміравіч Міцкевіч служыў палясоўшчыкам у князя Радзівіла, маці – Ганна Юр’еўна Міцкевіч, звычайная сялянская жанчына, займалася домам, побытам, клапацілася пра мужа і дзяцей. Па гаспадарцы Ганне Юр’еўне дапамагаў малодшы нежанаты брат Міхала Антось – Антон Казіміравіч Міцкевіч. Усё гэта па-майстэрску і з асаблівай любоўю апісаў ў славутай паэме “Новая зямля” народны паэт Беларусі Якуб Колас. Дарэчы, сёлета выдатнаму твору споўнілася 95 гадоў.
Выстаўка прадстаўлена двума тэматычнымі комплексамі: сям’я Міхала Міцкевіча і сям’я Якуба Коласа. Першы раскрываецца праз яркія і запамінальныя ілюстрацыі да “Новай зямлі”, зробленыя мэтрамі беларускага выяўленчага мастацтва: Васілём Шаранговічам, Лазарам Ранам, Іллёй Немагаем, Эдуардам Агуновічам. Рэчы, якія належалі Міцкевічам, якія былі ў паўсядзённым ужытку сям’і, арганічна ўраўнаважваюць палёт мастацкай думкі і надаюць вобразам, што ўзнікаюць ва ўяўленні наведвальнікаў выстаўкі, зямной канкрэтыкі і дотыкавай адчувальнасці.
Сям’я бацькоў, паўсядзённы ўклад, побыт, узаемаадносіны бацькоў паміж сабой, іх стаўленне да дзяцей сталі для будучага паэта і месцам, і зместам, і інструментам для фармавання асобы творца і чалавека. Упітаўшы лепшыя якасці народнага светапогляду, якім кіраваліся бацькі, атрымаўшы ў спадчыну ад іх залацінкі народнай мудрасці, Якуб Колас становіцца клапатлівым мужам і бацькам, стваральнікам і ахоўнікам свайго ўласнага сямейнага ачага. Тэматычны блок сям’і Міцкевічаў другога пакалення рэпрэзентуюць фотаздымкі самога Якуба Коласа, яго жонкі Марыі Дзмітрыеўны, сыноў Данііла, Юркі і Міхася, сваякоў, лісты народнага паэта да сваіх блізкіх, лісты ад іх, вершы-прысвячэнні.
САРДЭЧНА ЗАПРАШАЕМ!
Адрас музея: г. Мінск, вул. Акадэмічная, 5
Тэл. для даведак: 284-15-84, 284-17-03
Афіцыйны сайт музея: www.yakubkolas.by